Lanmou ou Lanmò

Moun ki pa damou an pa egziste
Leman lanmou si tèlman fò
Menm anndan kochon l atire
Poutan l diferan douvan metal lanmò

Sankara, Mouammar, Lumumba, Mandela
Yon jou konsa yo te la
Y ale, men yo ret chita nan listwa
E ou, èske zak ou ap mete w nan alada?

Lanmou pa gen zye men l wè tout kote
Li san memwa, men pèsòn li pap bliye
Lanmou san pye, priyorite l pa bote
Blan ou nwa, li pa nan bese triye.

Tout moun di yo se plantè lanmou
Men yo youn pa rekòlte lanmou
Malgre tout moun grangou lanmou
Yo pa vle separe lanmou.

Si lanmou gen sekrè pou l sikre tout kè
Lanmò konn sikre kè malfektè
Si lanmou kapab brize kè
Lè w gen lanmò w ap konn doulè.

Lanmou konn kreye jalouzi
Lè w jalou w ka fè moun mouri.
Sonje se te nan di n  »Dieu est amour »
Blan yo te mete rasin lanmò nou.

Si w rale labib w ap remake
Ke Adan te suiv lanmou l pou Èv
Olye l te obeyi pawòl letènèl.
Kretyen yo di: lanmou sa k envante peche.

Lanmou konn kreye lanmò
Konsa tou lanmò konn chase lanmou.
Lanmou konn epànye lanmò
Menmjan lanmò konn sove lanmou.

Ant lanmou ak lanmò
Kiyès ki pi fò?
Kiyès lè kowona k te chwazi
Fè lanmou « du matin au midi »?

Lajan pa ka achte lanmou
Li ka diminye grangou.
Konbyen moun ki pa t ap janm mouri
Si lanmò te g on pri?

Sèl mò yo k ka anseye lanmò
Isit yo di byen de ou sèl lè w defen.
Sèl kolòn mwen se kolòn vètebral mwen
Lank plim mwen k paspò m.

Si lanmò te dous, pèsòn pa t ap ret vivan.
Si lanmou pa t nounous, divòs t ap san.
Si lavi te miyò ke lanmò
Pou bay lavi Jezi pa t ap pran lanmò.

Romero montre lanmò se prèv lanmou.
Waw! menm anba tè Romero al fè lanmou.
Evelyne SINCERE panse Obed te damou l,
Pou l touye l misye kòmanse ak lanmou.

Pa gen lanmou san lanmò,
Menm lanmò kreye lanmou.
Si 2 mwa aprè mennaj ou mò
Ou gentan g on lòt, sèke pa t gen lanmou.

Pastè selebre maryaj
Konsa tou l chante fineray.
De moun Marye rete nan menm kay,
Sèkèy s on mezon k obligatwa pou tout laj.

Lanmò se sèl atakan k pa bezwen ekip.
Lanmou pa powetik, li syantifik.
Wayom mond lan konnen yo gen menm papa,
Anndan wayom sa, kiyès ki Wa?

Djeferson MONPHY


Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s